Moin! moin, so grööt de Plattdütschen un Norddüütschen, wenn se „Guten Tag“ meent.
Ik bün en vun de Plattsnackers, de uns anerkennte Minnerheitensprak hoch holln wüllt. Dorför hett ok uns Grundschool Mollhagen sorgt mit de Plattdüütsch AG an’n Anfang vun dit Johrdusend.
Uns Lehrersch, Fro Karin Arand, harr dat Leit un ik heff en Tietlang mitmoken dörft. Bannig freut heff ik mi doröber un veel Spooß dorbi hat. As Goethe sien Engel bi Faust seggt: „Wer immer strebend sich bemüht, dem helfen auch die Götter,“ seggt wi beten enfacher: Welkeen ümmer flietig övt un denn wat kann, de ward ok mal löövt. Jared Dibaba, den kennt wi vun’t NDR-Fersehen, köm to Besök. Inladt wern wi in dat ole un dat nee Ohnsorgtheater in Hamborg. Besünners aver an’n 11. Juli 2007 wör dat sowiet: Mit uns Plattsnackers sünd wi na Kiel na’n Landdag föhrt. Dat Gedicht „Rode Grütt“ vun unsen Heimatdichter Hermann Claudius hebbt se up de grote Landdagsbühn opföhrt. De veer Deerns drögen jede en Stroph vör un Till Raab vertell, woans de Rode Grütt mookt ward, wiel hei all de frischen Todaten enkelt ut den mitbröchten Korf ruthal un up den Disch pack: Suurkirschen vun Such ut Lüttensee, 1 Handvull Himbeeren ut den Schoolgoorn in Mollhagen un
1 Schöddel vull Eerdbeern ut Hermann Claudius sien Goorn in Grönwohld.
Landdagspräsident Martin Kayenburg, Bildungsministersche Ute Erdsiek-Rave, en poor MDL’s un vele Plattdüütsch-Intresserte hebbt tohört un fix applaudert. Uns Mollhagener Grundschool kreg den Pries:
„Wi snack platt – Plattdüütsche School 2007“
mit Siegel un Urkunn; kannst in’n School-Ingang sehn un lesen!
Frau Leonore Martens, damalige Schulleiterin, lobte: „So kommt das Plattdeutsche über die Kinder auch an die Erwachsenen zurück!“
Alfred Gatermann, 21.09.2019
