Tau dat Thema „Danzschaul“ kann ick gor nix seggen, ick heff bit hüt keen Danzschaul von binnen seihn. Ober Danzen, dat hett mi jümmer veel Spoß mokt. As lütte Deern mit Opa in de Köök, jümmer up un daal up den’n Terrazzo-Fautbodden. Ick harr so lütte rode Schauh, dat weern de „Flitscher“. Ja, de müss ick antrecken, denn flutscht dat erst richtig.
In uns Schaultied, dor harrn wü een Lehrer und siene Fru, de bannig girn Volksleeder mit uns euft hebbt. Volksdanz för dat Vogelscheiten-Fest bi Hüttmann up’n Saal. „Goh vun mi“ und „Wenn hier een Putt mit Bohnen steiht“ und noch veele mehr. Und dat Scheunste dorbi, min Gerhard weer jo in de Schaul bi de grooten Jungs un jümmer middenmang.
Later weer denn min Brauder so wiet. In de Schaul harr he gor keen Lust to‘n Singen oder Danzen. Ober denn hett he doch in Hamborg bi Siemens lehrt und harr woll ok Kumpels dorbi. Jedenfalls is he in Hamborg to Danzstunn gohn, dat weer jo nich ganz billig. He harr ja all utlehrt un kunn dat ok betahlen.
Jo, un obends hebbt wü denn in Lüttensee, dor wahnten wü ja nu all, dor hebbt wü up’n Korridor den’n eenfachen Sisal-Lööper uprullt und den güng dat los: 1, 2, 3, und 1, 2, 3 – nee, dat hett mi nich gefullen – und em ok nich. He hett schimpt und secht: „Du mit dinen Hamfeller Eenheitsschritt“ ….
Naja hett een beeten länger duert, aber denn weer dat fein för uns beiden up den‘n Danzsaal in Grootensee bi „Oesau“ to scherpeln.
Un wiel min Gerhard in de Schaul bi’t Danzen gaut uppasst hett, heff ick bi de eerste Deernsmusik in de Waldeslust (blots Damenwahl) jümmer tauseihn, datt ick em taufaten krieg… Denn keem de Fründin vun minen Brauder, datt is later siene Fru worden, de keem ok mit to’n Danzen und so hebbt wü „Veer“ eene scheune Tied mit Danzen taubröcht. (Ostern 1960 weer duppelte Verlobung bi uns in Huus!)
Jo un nu ? — Nu köönt wü noch veel doröber schnacken, datt is doch all sooo lang her, aber scheun is datt jümmer noch …. Datt wü beiden uns hebbt!
Hilde Schulz, Hamfelln April 2020
