In uns Schaulchronik vun Hamfelln steiht datt binnen. Vun 23. August 1944 is de Ünnerricht mit Lehrer Willi Peters in Gang. To de Tied bün ik “to Schaul komen”, den genauen Dag heff ik nich mehr rutkregen, steiht ok nich in mien Tüchnis.
Ik kann mi blots noch dorup besinnen, wü weern dree Deerns ut Hamfelln un een Jung ut Daahnger, de in de eerste Klass kämen. Dat mütt een sik mol vörstelln, 1944, ik weet noch, datt mien Mudder datt trech kregen hett un mi een Schaultüüt mit rosarodes Schrankpapeer tosamenkliestert hett. Keen anner harr so watt Scheunes.
De annern beeden Deerns wören vun den Gautshoff, Cousinen, de so old wören as ik. De een is bald no de Schaultied no Kassel trocken, de anner no Holland un hett dor ok heirod un een Familie gründ. Jo, vör 25 Johr hebbt min Brauder Fritz, min Mann Gerhard un ik dat schafft un een Dropen vun all de olen Schäulers ut Hamfelln in Gang bröcht. Dor sünd so an de 80 Lüüd ut ganz Düütschland bi de Waldeslust tosamen komen. De “Holländerin” un ehr Mann wör’n ok dorbi. Wü hebbt uns bannig freit un wedder anfründ.
Een poormol kunn wü uns gegensiedig beseuken, datt wör ne scheune Tied. Leider is Bärbel ut Rotterdam vör een poor Johr storben.
Hilde Schulz, geb. Fischer im Sommer 2013
