Düsse Boom steiht in uns Näächte, an’n Wech no de Waldeslust. Dat wör mol eene feine grote rote Beuk (Rotbuche). Nu is man blots noch een kümmerlichen Rest dorvun öber, Torso heit dat jo wull up hochdüütsch.
As wü junge Lüüd wören, dor hebbt wü beiden Gerhard un ik gern mal ünner de grote Beuk up de Bank seeten un all wiet vörut drömt, woans uns Leeven wull loopen schull. Denn geev dat mol een schwores Gewitter un de scheune Beuk is ut’nanner brocken. Dat is nu seeker mehr as 50 Johr her. Jo un denn is jedes Johr een beeten mehr dorvon affbrocken. De Kinner ut ‘n Dörp kunn sick dorin versteeken, so veel Luft wör in den hoolen Boom.
In’n Winter süht dat ganz apartig ut un de een orer anner Naturfründ hett dat knipst un as Foto mit no Hus nohmen.
De Beuk in Müssen, de de Sturm “Xaver” kaputt mokt hett, de hett mi gaut gefollen. De Biller von Herrn Flint sünd so gaut, dorüm müch ick em miene plattdüütsche Meenung dortau schicken.
Nu is an Luisenhoff in Müssen jo ok nich mehr veel von de Beuk noh- bleeven. Man dat lohnt sick, den ‘n Rest stohn to laten, de Natur mokt dor jedes Johr wat anneres vun.
