Op platt: Mien Beleevnis mit Recht un Unrecht

301
Foto: pixabay.com
Dieser Artikel wird Ihnen präsentiert von

Dat weer in’ne Oberschool. Mathe weer mien leevstes Fach. Dat mok Spoß, datt kunn ik, un de Lehrer gefull mi. Nu schull een Mathe-Arbeit schreeven warrn. Ik weer ehrgiezig un wull wedder as Erste fardig warrn. Flink güng mi dat vun de Hand. Keen Problem, Opgov för Opgov, fardig!

In‘e Paus meen mien Fründin: „Du , ik heff een‘ Fehler mokt bi de Rekenarbeit. Bi de letzde Opgov heff ik nich oppaßt!“ Dor füll mi dat in, ik harr den sülben Fehler mokt, ik harr to flusig arbeit‘, blot üm as Erste fardig to warrn! Oh, heff mi argert! Ja, wat mokt wi nu?-
De Mathe-Lehrer harr de Hefte in den Klassenschrank leggt. Mathe weer erst wedder in‘ poor Dag.- Wenn wi nu us Hefte heemlich rutsökt un to Huus de Opgov verbeetert?- Us Geweeten sä: „Dat is nich rechtens, dat is Bedrug!“

Aver na de Paus flitzden wi as Erste in‘ e Klass, holten us Rekenhefte ut’n Schrank un flink rin dormit in us Schooltasch.- To Huus mok ik erstmol mien annern Huusopgoven. Denn sät ik för dat Mathe-Heft. Ik keek un grövel. Ne, ik kunn dat nich! Mien Öllern harrn mi Recht un Unrecht un Ehrlichkeet bibröcht! Ik pack dat Mathe-Heft in un güng no mien Fründin. „Du, ik kann de Opgov nich verbetern, dat is Bedrug, dat is Unrecht!“- „Mi geiht dat ok so“, anter se, „ik kann nich bedrägen. Lat us de Hefte morgen ganz freuh wedder in den Schrank leggen!“- In’ne Nacht kunnen wi kuum slopen för us slecht Geweeten.

As Erste läupen wi in’e Klass. Aver wat weer dat? De Schrank weer afsloten. Wohrschienlich harr us een beobacht un us an de Lehrer verraden!

In de 2. Paus würr’n wi no den Mathe-Lehrer bestellt. Wi hebbt us so schaamt, dat wi sien Vertroon so mißbrukt harrn. Ok wenn wi de Opgoven nich verbeetert harrn: Unrecht blifft Unrecht! Aver wi hebbt dorut lehrt: Nie wedder Unrecht doon! Immer op den rechten Weg bliewen.- Uns Mathe-Lehrer hett uns vergeeven; un wi hebbt em dankt, indem wi fliedig weern un ümmer den rechten Weg gohn sünd! Dat weer us eene Lehr för dat Leeven!

Beleevt un upschreeven

vun Helga Schaarschmidt, 24. Oktober 2018