Herzogtum Lauenburg (hs). Noch muss auf den Mai gewartet werden, aber man kann sich schon jetzt Gedanken zum Tanz in den Mai machen. Die Plattdeutsch-Übersetzerin Hilde Schulz hat für die Leserinnen und Leser von Herzogtum direkt eine Anregung: Kuddel Muddel, och nee wat is dat denn? Ja, ick heff sülbst lang överlecht, ick weit woll wat dat is, man dat jüch to verkloren, dat is nich so eenfach.
Kuddel Muddel, dortau fallt mi toerst in, dat is doch een Dörcheenanner. Man blots dat Wurt secht doch keeneen mehr hüttodags.
För mi un mine oolen Frünn is dat man noch gaaanz wat anneres! Wokeen kann sick noch dor up besinnen, woans wü danzt hebbt? Bi Ida Hüttmann oder in de Waldeslust up’n Saal. Dree Muskanten hebbt den ganzen Abend Musik mokt und wü hebbt scherpelt. Keen Danz wör utlaten, nee, dat mokt doch grad so veel Spoß. So, und denn hölt de Musik up’n Mol an, een lütten Tusch ward blast und denn heit dat „Kuddel Muddel“ und dat Spektakel geiht los. Jedeen söcht sick ganz flott een annern Danzpartner oder Partnerin und wü dreiht uns vergneugt all dörch ‘n anner. Up’n Mal is de Musik still und wü mütt seihn, dat wü een annern Danzpartner find, wat is dat för’n „Kuddel Muddel“? Du müsst di ja een schmucke Deern oder eenen feinen Kirl utseuken, den‘n du lieden magst oder de gaut danzen kann. Dor geihst du fix henn und klatscht in dine Hann, dat „Affklatschen“ ist ja de Hauptsaak. Und denn büst du de „Niege“.
Dat dörf nich so lang duern, de Musik speelt glieks wieder und denn is de Saal wedder vull mit Danzpoore, de sick fix dreihen könnt.
No en lütt Wiel steiht de Musik wedder mol still, dat Speelwark geiht vun vörn los und jedeen de Lust hett, freit sick up een annere Partnerschap.
Bi so’n Vergnögen kannst du een Hupen Lüüd kennen lirn – und markst ok, wokeen gaut danzen kann, orer ok nich so gaut….
Min Mann Gerhard, he kunn gaut danzen und ick heff ja all bald markt, dat dat Danzen mit em för uns beid richtig Spoß mokt. Man annere Deerns hebbt dat ok markt, dat he ganz fein danzt und denn würn wie affklatscht und ik müss mi een annern Dänzer seuken.
Aber later hebbt wü uns ja doch kreegen…. Und sünd nu all benah 65 Johr verheirad. Striet und Larm geef dat nich bi uns in de Familie.
So, nu weet jü Bescheed, wat ut „Kuddel Muddel“ allns warden kann. Mit beste Gröten vun Hilde Schulz ut Hamfelln
