Herzogtum Lauenburg/Hamfelde (hs). Hilde Schulz aus Hamfelde hat die Unwetter der vergangenen Tage mit einiger Aufregung überstanden. Auf plattdeutsch lässt sie die Leserinnen und Leser von Herzogtum Direkt an ihren Erlebnissen teilhaben:
Leeve plattdüütsche Frünn, nu is de Mai ok all wedder binah to Enn, man gistern an‘n Sünndag weer bi uns richtig wat los. Dat hett doch in de Nacht vun Sünnabend up Sünndag hier in Hamfelln düchtig Gewitter geben und ok bannig veel Regen is vun Himmel dahl kaamen. Ja und annern Morgen, ik stah jo nich so laat up, dor bruk ick to’n Freuhstückskaffee ok Melk. De Hamfeller Melk steiht as Vörrat jümmer in’n Keller in‘t Keuhlschapp. Ick heff mi bannig verfehrt, dor käm mi doch tatsächlich all dat kloore Waader ut den‘n annern Kellerruum entgegen. Ick weer so verdaddert, kunn dat erst gar nich begriepen. Naja Feudel und Emmer is jo flink to Hand, man denn seih ick , dat is ja veel mehr Waader, dat is alln’s dörch dat Kellerfinster rinloopen…. De Dackrünn weer nich Schuld doran, de is sauber!
Bit Middag harr ick ja woll de Hälfte dorvun „rutschaaben“, mit min oolen Schrubber. Dat weer täämlich ümständlich, wiel dat Waader ja nich bargup lopen will und schull aber in den’n annern Kellerruum, de een Affloop hett…
Nomiddags kriegt wü Beseuk vun „uns Anne“, de schnappt sick een Afftrecker, baut sick dor een Bessenstehl an und denn geiht dat los, plattbars in dat koole Waader . Een poor Pappkartons sünd natt und ward wechschmeeten, aber würklich kaputt gohn is nix . Mi sünd een poor groote Steen vun’t Hart follen, hüt süht de Welt all wedder veel beeter ut.
Gott si Dank is nix Schlimmes passert…dat secht Hilde Schulz ut Hamfelln an 27. Mai 2024.
