Herzogtum Lauenburg (hs). Hilde Schulz, die Plattdeutsch-Übersetzerin von Herzogtum direkt freut sich über den Monat Mai und lässt die die LeserInnen an ihrer Freude teilhaben. Wie immer schreibt Hilde Schulz auf Platt ihre Erlebnisse.
Junge, junge, wat is dat up’n Mal allns bunt und greun in de Natur. Kannst gor nich so flink begriepen….De Vagels zwitschert ja woll üm de Wett, vun morgens bit abends sünd de in Gang. Se mütt sick ja ok beiilen, mit Nest moken und Eier leggen und so wieder.
De Woold is ok so wunnerscheun, dat frische Greun vun de Beuken, tau und tau scheun. Und allns rückt so sauber, ick kann gor nich nauch kriegen dorvun. Dorüm gah ick so girn no uns Bank in de Hahnheid, ja da steiht uns Imkerbank all sieht över 20 Johr . Wenn du di dahlsetzt und in Heeben kieken deihst, dorbi noch in de Sünn mit de Oogen blinkers, dor ward di ganz nohdenklich tomaud und du büst dankbor för dissen Oogenblick.
Min Gooren is ok greun, man nich boots dat Greun, wat ick girn mach för Salat und so wat. Nee, överall find ick Wildkrüter, ick kann gor nich so veel Giersch upeeten, as dor wassen deit, dat könnt jü mi glöben.
Aber Verseuken dau ick dat, ut de scheunen, jungen Planten vun miene oolen Blaumenstauden, dor hol ick den Giersch rut, so gaut as dat man geiht.
Ja und denn frei ick mi över eenen lütten Struß Maiglöckchen up den Kökendisch. Dat wör doch to mine Kinnertied de Struß för Mudderdach. Plückt heff ick dat domols in de Kowörer Dann, dör wüssen noch welk. Een poor sünd noch in unsen Goorn und bleuht scheun ünnern Appelboom.
Watt hüt bi mi an Kökenfinster seeten hett, dat wör een echten Maisepper… ja dat könnt jü mi glöben. Ick heff em vörsichtig von de Schief nohmen und in unsen Jasminbusch sett, dor sünd all scheune, greune Blääd an. Wo he affbleeven is, dat weit ick nu nich…
De Mai is dor mit all sien Greun !!!! Und ick schick scheune Gröten ut Hamfelln.
Jüch Hilde Schulz, in Mai 2026
