Herzogtum Lauenburg (hs). Die Plattdeutsch-Übersetzerin teilt ein Erlebns aus Kindertagen mit den Leserinnen und Laesern von Herzogtum direkt. Damals waren die Dorfstraßen im Lauenburgischen noch Sandwege und machnes Haus hatte keine Hausnummer.
De Geschicht vun „Onkel Lo“
Dat wör uns Nohber as ick noch een lütt Deern wör. De erste Nahber, wo ick alleen to Faut up de Sandstraat henn dörf, dat wör Onkel Lo. Und de harr jümmer Tied för mi. So wat geef dat dumols noch bi uns in Hamfelln. Onkel Lo wör Bahnwärter und müss uppassen, wenn een Zuch ansecht wör, dat de Schranken rechttiedig hendahldreit wörn und ja ok wedder hoch. Achterna güng hei denn so flink as hei kunn mit sin Holtbeen (ut’n Krieg mitbröcht) in sine Baud ut röp in den Telefonkassen: „De Zuch is dörch“!
De Streck von Olschlo bit no Swattenbek wör to min Tied so üm 1942 bit 1945 een wichtige Bahnstreck und later ok för de Tommys ehre Bomben. To’n Glück is in Krieg nich so richtig veel passeert in uns lütt Dörp.
Onkel Lo harr witte Zeegen, de wörn mit son Isenpahl an den Bahndamm anbunnen und kunnen den ganzen Dag dat Gras affreeten. Nächsten Dag kämen se denn up een anner Flach, dor harrn se wedder frischet Greun. To’n Abend wören se in Stall bröcht und Tante Lo hett een poor dorvun molken. Ut de Zeegenmelk hett se denn ok noch Bodder mokt. De hett mi aber nich schmeckt…
Worüm mi dat nu grad in April infallt, dat kann ick verklorn. Hüt, hier bi mi in Gooren bleuht een poor vun de wilden, geelen Schlöttelblaumen…. (de meesten Lüd secht dor Primeln tau). Ja, und de heff ick as Deern üm disse Johrestied so girn bi Onkel Lo an Bahndamm plückt und denn Struß ok verschenkt. Laater in’n Sommer wüssen dor so ganz lütte, seute Eerdbeeren, de heff ick doch ok so girn plückt und wechnascht. An de Böschung vun den Bahndamm dörf ick ja ok blots, wenn Onkel Lo dat verlöövt hett, süsst wör dat ganz streng verbaden. Hei wüss jo ok genau, wannehr de nächste Zuch dörch föhrt. Und nie nich is dor een Minsch toschaden koomen.
Onkel „Lo“ wör vör uns Kinner, minen Brauder Fritz und mi eenfacher to Schnacken. De richtige Nam wör ok mit „L“, harr wat mit Lokomotive to daun, aber för so’n lütt Schnut nicht to begriepen.
