Dat hebbt jü doch seeker all mol beleevt. Grad wenn dat buten so richtig schietkold is, denn geiht diene Heizung kaputt! Bi uns is dat köttens so passert. Gerhard un ick sitt bi‘t Freuhstück, dat Duschen weer scheun warm und nu schmeckt de heite Kaffee uns beiden. Denn so bi lütten mark ick, datt de Heizkörper an mine Siet nich warm ward, na ja, dat duert ja jümmer een beeten länger, wenn wü duscht hebbt. So üm Klock elben, dor is dat noch nich warm und Gerhard geiht mol in Keller to’n nohkieken. Ja, dat warme Water funktioneert, aber de Rest vun de Heizung is kold.
Anwecken in Ahrensborg bi de Firma, de uns jümmer versorgt. Oh ja, no lange Schnackeree hör ick grad noch: „Dann kommt morgen zwischen 9 und 11 Uhr der Monteur zu Ihnen“, dat gefallt mi gor nich, ick roop dortwüschen: „Nee nee, dat geiht nich, wü sünd oole Lüüd und brukt een warme Stuuv!!“ Keen Antwort mehr….
Naja, eerstmol goh ick in‘n Schuppen und hol Füerholt för den oolen Kacheloben, man bi so’n natte Luft, dor treckt de Oben ok nich glieks so, as du dat girn hebben willst. Aber beeter wat as gor nix!
So langsam ward dat in de Köök een beeten komodig, ick sitt und lees de Lübecker Nahrichten. Gerhard is vör Arger mit all sien Tüch in’t Bett kropen. Middag eeten, harrn wü beiden ok keen Lust – wat schall ick seggen, de Oben besinnt sick und warmt nu doch de Stuuv und Köök een beten. Den klingelt dat vördn an de Huusdör. Nanu denk ick, de Klock is halvig twei, de Post is dörch, na mol seihn watt los is. Dor steiht een Kirl mit Arbeitstüch und swatte Tasch vör mi , wü kiekt uns an, ick weit nich wat los is. Dor secht hei: „Bei Ihnen is doch die Heizung kaputt .“ Nu fallt bi mi de Groschen. Ick mok beide Arms breit und sech: „An leevsten würd ick Se nu ümarmen“, he grient – und wü goht glieks in‘n Keller. Hei weit gaut Bescheed, ick weck Gerhard ut’n Schlap und hei geiht ok in Keller. Ja de een Pump is kaputt, oh Mann denk ick, dat kann ja duern mit Bestellen und so. Nee secht de Monteur, sowat heff ik doch an Bord (in ’n Auto). De ganze Arbeit hett keen Stünn duert – een ölliches Drinkgeld hett hei noch mit up’n Wech kreegen. Vun dor up an harrn wü dat ganze Huus wedder warm. Gott si Dank!
Beleevt un upschreeben vun Hilde Schulz, Hamfelln März 2023
