Hüt mütt ick mi mol een beeten watt vun de Seel schrieben. Ja, dat is nu all so lang in de Gang mit Corona. Vun alle Sieden mokt se uns bang, dat ward jümmer leeger. Ick will jo ok nich rümjarpen, wü beiden oolen, Gerhard und ick, wü blievt doch sowieso to Huus, mit Maske för de Döör orer to’n Inköpen is doch klor. Tweemol to’n Impfen sünd wü ok all west, dat drütte Mol schall erst in Januar los gohn, wiel de Dokters so veel to daun hebbt.
An’n 1. Juni 2020 heff ick all mol een Geschicht över mine Sorgen mit Maske (Snutenpulli und so) schreeben. Ick glöv, dat geiht ganz veele Leser vun „Herzogtum direkt“ so as uns und dorüm mein ick, nich blots de jungen Lüüd hebbt dat schwor, uns geiht datt ok nich gaut…. Min Vadder wör seggen: „Mi ward dat bilütten kruupen“. Wokeen kennt den’n Schnack wohl noch?
An 24. November 2021 schull uns Dropen mit de Plattdüütsch Runn in Groothansdörp sien. Twei Johr hebbt wü uns nich seihn. De Baas hett extra dorför den grooten Sitzungssaal in’t Rathuus kreegen. Nu hebbt wü alln‘s affsecht. Is tau gefährlich, dat een anstreeken ward und kricht denn noher Corona…
Acht Daag later wullen wü beiden, Gerhard und ick, unsen 60. Hochtiedsdag fiern. Dat ward ok nix, Besöök könnt wü nich bruken, wedder blots wegen –„Co…“
Dat deit mi richtig weih, nu hofft wü mol, dat de ganze Kram bit nächstet Johr Juni vörbi is, denn fiert wü minen Geburtsdag und allns annere up een Mal. Wenn wü denn all gesund sünd….
Scheune Adventstied wünscht jüch all tohoop
Hilde und Gerhard Schulz 21. November 2021
