Herzogtum Lauenburg (hs). Die plattdeutsche Übersetzerin Hilde Schulz erinnert sich an an einen Familiengeburtstag und teilt ihre Erlebnisse mit den Leserinnen und Lesern von Herzogtum direkt in plattdeutscher Sprache: Dat weer de 9. November 1999 un uns Mudder ehr 90. Geburtsdag.
Bannig wat los an den Dag. In Strandwech in Lüttensee kümmt op eenmal een feinet, blankpoliertes, ooles Audo vörtoföhrn, Opel P 4,graad so old as uns Mudder. De Fohrer is Wolfgang ut Triddau, he kennt uns Familje ewige Tieden, is so old as min Brauder. Sien Mudder is mit uns Mudder in Kuddewör konfermert. Dat is so up’n Dörp. Wolfgang speelt Chaufför un tukkert nu mit uns Mudder los, ganz sutje dörch den Strandwech, Bollmaur, na Triddau, Grann, Kuddewör un toletzt no Hamfelln/Lbg.Dor sünd wü ja all tohop geborn. In de „Pirsch-Möhl” wulln wü nu mid de Familje den Geburtsdag fiern.
Wat weer dat förn Wunnerwarken, as de beiden antoföhrn keemen. Ober uns Mudder meen denn doch: „Mit so‘n richtigen Porschewöör se eegentlich veel lever föhrt“, de Oldtimer güng ehr nich flott nauch. Naja – den man rin in de Gaststuv, in November is dat buten nich mehr gemütlich.
Dat Graduleern duert erst mal een Tied, ober den güng dat los. Uwe mit sien Quetschkassen speelt för dat Geburtsdagskind un wü singt alltohop een poor scheune Leeder. Dorna gift dat veel gaude Saken to’n eeten un drinken un all sind vergneugt. Poor plattdüütsche Döntjes ward vertellt. Uns Mudder mach de bannig gern hörn, aber platt snacken, nee dat wull se nich, dat weer ehr woll nich fien nauch. Min Brauder sitt dor – un grient sik eenen.
An een annern Dag wörr noch eenmal fiert. Up Schlüshörn in Strandwech gift dat een Lokal, de Lüd kennd man ok lang naug. Dor is de Nabarschap den inlaad. Fru Hilger hett as Öberraschung mit de lüdden Rieder-Kinner een Leed instudeert. De Lüdden sünd verkleed as Blaumenkinner, Twergen, Engels un sowat. Dortau danzt se in Kreis. Lichten sünd ok noch mit bi. Dat het uns Mudder bannig freit, se weer den in den Kreis von de Twergen de Keunigin.De Familje, dat weer de Stolt von uns Mudder, 3 Kinner, 4 Enkel un 3 Urenkel. Uns Mudder is denn noch 97 Johr old worn.
Upschreeben vun Hilde Hamfelln, 22. Februar 2026
