Hamfelln/Hamfelde (hs). Dat weer scheun gemütlich bi uns in de Stuuv, Beseuk harrn wü nich. Naja in’n Glotzkassen is ja an’n so’n Abend för uns ok nich recht wat bin’n. Ick harr mi doch up de Rummelpott-Kinner freid und extra feine Naschis inköft bi Süllau. Mini Knoppers und Eiskonfenkt…. de Tieden wo wü Niederegger Marzipan in Mengen schenkt kreegen hebbt, de sünd vörbi.
So – und denn sitt ik in de Köök an’t Finster und buten pladdert dat, allns wat vun Heeben rünner will , schütt Petrus nu hier ut. Dat ward düster, ik mok dat Butenlicht an, vördn und achtern, dormit de Lütten uns Husdör beeder finnen könnt. Ik dacht, een poor Lüüd hebbt villicht min Rummelpott-Leed vun letzte Woch in Hahnheider leest und harrn nu Lust up sowat mit ehre Kinner. In’n Fernsehen hebbt se dat an Friedag ok noch in‘t Schleswich Holsteen Magazin bröcht und verkloort, woans man eenen Rummelpott ut eene Blickdoos moken kann.
Wat schall ick seggen, nich een Minsch is koomen, ik heff noch luert und utkeeken, nix to seihn. Denn bün ick wedder in de warme Stuuv. Fernsehn weer jümmer noch dat sülbige Speelwark, wü hebbt affschallt un uns watt vertellt. Un denn ward ja so bilütten gegen Middernacht buten beten luter, de een und anner lett all mol to’n Probeern een lütt Raket in de Luft fleegen. Dor will ik taukieken, sülben knallen, nee dor heff ik Bang vör, den’n Larm mag ik nich lieden, de bunten Sterns an Heeben ja de sünd scheun. Und Petrus hett dat Inseihn, he schivt de Wulken an de Siet und schickt warmen Wind no uns henn. Weer dat scheun, min Jack vun Haken , Erdbeermütz ! ja, de givt dat würklich, se hett mi all för mennig een Koppweihdaag bewohrt.
Gerhard und Katja koomt ok rut und dat ward jümmer mehr Lüüd up den‘n Kabenwech und de Heeben ward jümmer bunter….Prost Niejohr raupt wü in den Runn – ik heff minen Korf mit all den Naschkram inne Hand und goh dormit rümm.
Jedeen dörf sick wat rutseuken. Dat hett fein klappt, de Freid weer groot und Spooß mokt hett mi dat , wieldat ik nu nich mehr dormit rümheuden mütt – und sülben eeten, dat is den doch to veel vun’t Gaude! An annern Morgen weer jümmer noch feinet Weeder, ik bün rut und heff mi wunnert, wo scheun de Straat uprüümt weer, keen Schiet und Dreck to seihn. Alle Achtung, dat weer nich jümmer so! Mine Familie und ik, wü secht Danke dorför und nochmal alln’s Gaude för ditt Johr 2023.
Beleevt und upschreeben vun Hilde Schulz, Hamfelln, an’n 2. Januar 2023
