Herzogtum Lauenburg (hs). „Meine plattdeutsche Geschichte erzählt euch, wie ich das diesjährige Dorffest in unserm schönen Hamfelde Stormarn erlebt habe“, viel Spaß damit wünscht wie immer Hilde Schulz ut Hamfelln
Düttjohr wör allns anners oder? Jedenfalls hett mi de ganze Dag vun dat Dörpfest so gaut gefolln, ick schwöög dor hüt noch vun. Dat füng ja morgens Klock halvig acht all an. Eenerwegens is doch Musik to hörn? Ick achtern rut ut de Kökendöör, ja richtig up de Dörpstraat Richtung Trittau, dor hör ick Trummel und Trumpet. Dat fangt ok grad so’n beeten an to Drübbeln, Jack antrecken, beeten Lüttgeld in de Tasch und rut up de Straat. Handy to’n Knipsen noch flink mitnehmen – dor kämen se all. Hebbi mit sien scheunen, oolen Trecker und up den bunten Anhänger sitt de Muskanten. Se wüllt ja de Lüüd in’t Dörp upwaaken mit ehre Musik und dat klappt ok, an mank een Finster wart all winkt. Ick will noch mien Spenn för de Musik loswarden, man Hebbi markt dat nich und hölt nich an. Dorüm mütt ick noch beeten achterran jachtern und denn klappt dat und wü hebbt wat to Lachen. Denn käm uns Anne mit eehre Lütte und wü mookt noch een poor scheune, bunte Wimpeln an uns Heck fast, Luftballons harrn se noch mitbröcht. So gefallt uns dat. Dorna güng dat ja ok all up’n Dörpplatz mit de Wettspeele för de Kinner los. Dat is nix mehr för mi, de beeden sünd Plattbars alleen dorhen. Ick as Oma wull denn nahmiddags to’n Kaffeedrinken mit Musikümzuch und all de feinen grooten und lütten Lüüd Richtung Dörpplatz mitgohn, dat wör so scheun, wieldat ick mi ünnerhaaken kunn bi uns Anne. Kaffee und Torte geef dat, dat wör so lecker und hett mi so gaut schmeckt, ick heff mi ganz dull dorför bedankt bi all de Hülpslüüd.
No Huus bün ick ok noch to Faut gohn, mi hett een leeeve Hamfellerin ünnerhaakt und is mit mi bit vör de Kökendör mitgohn. Danke ok dorför nochmal.
So scheun kann dat Dörpfest sien – meent juch Hilde ut Hamfelln 7. Juli 2025
